Педагошкиот факултет да постигне извонредност во образованието на студентите, идните наставници, воспитувачи и библиотекари и тоа ќе се темели на стекнатите компетенции и излезните резултати од учењето. Нашите студенти треба да бидат подготвени да одговорат на сите предизвици на професијата и да претставуваат сила на развојот на образованието на земјата. Факултетот ќе делува како институција која ќе ги почитува академските, мултикултурните и етичките вредности, принципите втемелени на почитување на универзалните човечки права и ќе биде место на критички приоди во решавањето на образовните прашања.

Факултетот ќе ја унапредува соработката со други факултети при УКИМ, други универзитети и факултети во државата и надвор од неа, невладини организации и здруженија, основни училишта, предучилишни установи и библиотеки со цел да ја усовршува наставната, научно-истражувачката и стручната работа. Целта на соработката особено со сродните факултети во земјава ќе има за цел да се усогласат ставовите за значајни прашања во сферата на предучилишното воспитание и примарното основно образование. Исто така ќе се засили соработката со Министерството за образование и наука и Бирото за развој на образованието. Факултетот треба да го потврди и унапреди својот авторитет во поглед на влијание и придонесување кон државнички одлуки поврзани со статусот на иницијалното образование на наставниците и воспитувачите како и воопшто со статусот на предучилишното воспитание и образование и примарното основно образование во државата. Со изработка и акредитирање на програми за стручно усовршување и перманентно образование, Факултетот треба да си го заземе местото кое му припаѓа и да стане главен центар за стручно усовршување на наставниците и воспитувачите.

Педагошкиот факултет да прерасне во препознатлив, респектабилен, перспективен, етаблиран, уважен како силна високообразовна институција која ги применува и ги прати најсовремените методи на проучување и поучување. Исто така ќе се залагаме Педагошкиот факултет да биде препознаен како центар на основното образование и како центар на предучилишното воспитание и образование. Заедно да придонесеме алумните на Педагошкиот факултет да бидат барани и ценети наставници во пошироки размери.

Педагошкиот факултет „Св. Климент Охридски“ во Скопје заслужува да биде меѓу водечките национални, академски институции за образование на наставници и воспитувачи препознатлив и во меѓународни рамки по квалитетното образование кое ќе се заснова на концепцијата на доживотно образование. Факултетот ќе делува како динамична институција која ќе поттикнува мобилност и развој на потенцијалот на секој поединец: професори, асистенти, студенти, администрација. Нашата визија е Факултетот трајно да ја унапредува својата дејност, да оствари високи академски стандарди, да осигурува квалитет и да презема целосна одговорност за сопственото делување и напредување.

Педагошкиот Факултет „Св. Климент Охридски“- Скопје е основан на 13.6.1995 година со Одлука бр. 08-856/3 на Универзитетската управа на Универзитетот „Св. Кирил и Методиј“ во Скопје. Оваа одлука била донесена врз основа на изготвениот Елаборат за едукација на воспитувачи и на одделенски наставници, како и врз основа на согласноста на Министерството за образование и физичка култура бр. 12-2247/2. Исто така Министерството за образование и физичка култура на Република Македонија со Решение бр. 12-2742/3 од 1.10.1995 година, издаде согласност за примена на наставните планови на Факултетот. Реализацијата на овие наставни планови за студиските групи одделенска настава и предучилишно воспитание започнала во учебната 1995/1996 година со запишување на првата генерација на четиригодишни студии на двете студиски групи на три наставни јазици македонски, албански и турски наставен јазик. 

Педагошкиот факултет и неговата мисија почиваат на една долга традиција, започната со Климентовата просветителска дејност во неговата школа во Охрид, позната како прв Словенски универзитет, низ кој поминале околу 3500 ученици. Од особено значење за развојот на образованието во нашата земја е основањето на Вишата педагошка школа „Климент Охридски“- Скопје, со Уредба бр.7852 на Владата на Народна Република Македонија, во 1947 год. На почетокот од нејзиното основање, во Вишата педагошка школа наставата се изведува во рамките на пет студиски групи. Со текот на времето се зголемува бројот на студиските групи, така што во 1952 год. се изведува настава на 13 студиски групи, меѓу кои се и студиските групи на албански и на турски јазик, а во 1953 год. бројот на студиските групи се зголемува на 17. Наредните години нивниот број се менува во зависност од интересот за студирање и од општествените потреби. Вишата педагошка школа, согласно Законот за високошколските институции, од 1961 год., прераснува во Педагошка академија, на која покрај предметната настава се отвора и група за Одделенска настава. Во текот на своето постоење Педагошката академија „Климент Охридски“ во Скопје се афирмира како значајна установа за оспособување наставен кадар за основните училишта во Социјалистичка Република Македонија, со вкупно 14 наставни групи од кои  во 12 наставни групи се изведувала настава на македонски наставен јазик, во 6 на албански и во една група на турски јазик. Врз основа на законските одредби и Концептот за трансформација на педагошките академии, од јануари 1983 год., Педагошката академија „Климент Охридски“ во Скопје почнала постепено да се вклучува во овие развојни процеси. Заради подигнување на квалитетот на наставата во основното образование било потребно да се подигне и нивото на стручното и на педагошкото образование на наставниот кадар во Р.М. За таа цел е основан Педагошкиот факултет „Св. Климент Охридски“ – Скопје, со што дотогашните двегодишни студии на Педагошката академија прераснуваат во четиригодишни академски студии. Во учебната 1994/1995 година е запишана последната генерација студенти на Педагошката академија „Климент Охридски“ во Скопје, а во текот на нејзиното постоење своето образование за наставници на македонски, на албански и на турски наставен јазик го оформиле 13 000 студенти.

Денес, Педагошкиот факултет „Св. Климент Охридски“- Скопје е единица во рамките на Универзитетот „Св Кирил и Методиј“ во Скопје, и е модерна наставно-научна и образовна институција која ги следи современите достигнувања во научните дисциплини и методиките кои се релевантни во процесот на формирање на воспитувачки и наставен кадар за потребите на предучилишното воспитание и одделенската настава во основното образование во нашата земја. Во учебната 2004/2005 година започнавме да ги применуваме новите студиски и предметни програми според Европскиот кредит трансфер систем. Од тогаш континуирано, за секоја следна генерација  студиските програми на Факултетот се осовременуваат согласно промените што се случуваат во образованието на глобален и национален план како и според искуствата на реномираните европски и светски наставнички факултети кои продуцираат слични кадри.

Последната акредитација за студиската програма по Одделенска настава од прв циклус на академски додипломски студии (240 ЕКТС), е со решение бр. 08-791/4 од 27.04.2023 година. Добиената акредитација е за период од пет студиски години почувајќи од студиската 2023/2024 година.

Последната акредитација за студиската програма по Предучилишно воспитание од прв циклус на академски додипломски студии (240 ЕКТС), е со решение бр. 08-792/4 од 27.04.2023 година. Добиената акредитација е за период од пет студиски години почувајќи од студиската 2023/2024 година.

Покрај студиските програми по одделенска настава и предучилишно воспитание, на 15. 9 2010 година на Педагошкиот факултет „Св. Климент Охридски“ започна со работа нова студиска програма по Библиотекарство, со што факултетот ја прошири својата дејност со едукација на нови кадри од областа на библиотекарството. Последната акредитација за студиската програма по Библиотекарство од прв циклус на академски додипломски студии (240 ЕКТС), е со решение бр. 08-793/4 од 27.04.2023 година. Добиената акредитација е за период од пет студиски години почувајќи од студиската 2023/2024 година.

Во учебната 2010/2011 година започна реализацијата на студии од втор циклус по студиските програми Одделенска настава и Предучилишно воспитание кои се изведуваат на три наставни јазици македонски, албански и турски. Тие беа акредитирани од Одборот за акредитација со Решение бр. 12-1041/2 од 25.02.2010 и Решение бр. 12-141/3 од 25.02.2010 година.

Во учебната 2015/2016 година започна и реализација на втор циклус на студии по Библиотекарство како едногодишни и двегодишни студии, акредитирани од Одборот за акредитација со Решение бр. 12-205/4 и Решение бр. 12-205/5 од 17.03.2014 година. Последната акредитација на студиската програма Библиотекарство, втор циклус на академски постдипломски студии (ЕКТС) е добиена Одборот за акредитација со Решение бр. 08-291/6 од 09.11.2021 година. Акредитацијата согласно ова решение е за пет студиски години почнувајќи од студиската 2021/2022.

Од 2014 година Педагошкиот факултет „Св. Климент Охридски“ организира студии за Педагошка доквалификација во траење од еден семестар. Овие студии претставуваат трајна задолжителна форма на педагошка доквалификација во вид на стручна педагошко-психолошка и методска подготовка на сите стручни профили кои завршиле ненаставнички факултети, а се подготвуваат за воспитно образовна и наставна работа во основното и средното образование. 

Во учебната 2017/2018 година започна со реализација студиската програма од трет циклус студии по Образование на наставници (за примарното образование) акредитирана од одборот за акредитација со решение бр. 17-232/3 од 18.01.2017 година. Следната година започна со работа уште една студиска програма од трет циклус студии по Рано детско образование и воспитание акредитирана од Одборот за акредитација со решение бр. 17-385/4 од 20.06.2017 година. 

Последната акредитација на трет циклус студии за студиската програма Рано детско воспитание и образование од трет циклус академски студии- докторски студии (180 ЕКТС) е со решение бр. 08-293/7 од 17.09.2021 година. Акредитацијата за студиската програма според ова решение за пет студиски години почнувајќи од 2021/2022 година.

Последната акредитација на трет циклус студии за студиската програма Образование на наставници (примарно образование) од трет циклус академски студии- докторски студии (180 ЕКТС) е со решение бр. 08-292/7 од 17.09.2021 година. Акредитацијата за студиската програма според ова Решение е за пет студиски години почнувајќи од 2021/2022 година.